Luke 8

Vaikala Tovola'i sou Itema Usu'a Ovu Ngiaxu

(Mat 13:1-17; Mak 4:1-12)

1Xe ili'i, la Iesu muxixaoxao no tuatuala se'i tatatila xe se'i kitukitu'a sou mua'aloi'a ta mitema sou a'alo laixe sou saxisaxila'u noxou Lataua. La ta molomolo noxou mavulovexa mo mulu'e no lia tamei kalumo a mimulinu ne. 2 ^aMo ta sema mose'i e tei la Iesu mukusai'a ta ulee ta masumasua noxi'a mo mupamauline'i no anu pipienaxa'a ne, ane'i a imumulinu kalumo. Vile ualasie lexe Malia sie Maxatale e Iesu mukusai'a ta ulee ta masumasua muxatele tamei noxie. 3Xe vile ualasie lexe Ioana e Kusa semau. Io, Kusa ne, anu itema tila noxi'a ane'i ane isaxila'u tani noxou Elodesi. Xe Susana ilo'a ta sema tapiena mose'i la mimuline'i Iesu ilo'a ta molomolo noxou. Ane'i ta sema ane ne, mimolo mimii noxi'a sou isu'usu'uline'i Iesu ilo'a ta molomolo noxou no anu.

4Ta mitema tavu'alo mixali mipita noxou Iesu, ia ta mitema me'a no tuatuala kalumo mixaxali sio sou mipita noxou, la Iesu muvikala tovola'i vile mulai noxi'a aloxo 'o, 5“No voxo vile, la itema vile mulai no xai sou usu'anu ovu ngiaxu. No mine anu ususu'anu ovu ngiaxu ne, la se'i mulapalapau no vote'i. La ta mitema mimalomaloxou xe ta ngiala mi'ou. 6Xe mose'i mulapalapau no lavolavo'o. La mupau, ia muxalo la. Xo lia siliu uasi. 7Xe mose'i mulapalapau no xuxua tanutanu, xe muleme la xuxua ne muisiisinu mole uleme laixe sou unene'a uasi. 8Ia mose'i mulapalapau no lia laixe mole muleme muxali tila sou munene'a. Mose'i muxalixu ngiaxu itemaxu ta'uve (100).”

Iesu muvikala tavola'i mulai noxi'a mukalu, la mu'ava noxi'a aloxo 'o, “Itema ane anu mulavu lexe anu sangalou a uxoxolu sou ulolomu no anu, la laixe lexe anu ulomusou vaikala ane ne no anu.”

9Ioxe, ta molomolo noxou Iesu milomusou vaikala tovola'i noxou ne, ia ilamana no anu uasi. La sou ane'i mitali'isou Iesu lexe ulamanalixa'a no anu vaikala tovola'i ne laaxu. 10 ^bLa sou Iesu mulamanalixa'a no anu aloxo 'o, “Lataua mulosiengixu laaxu vaikala mutalume sou saxisaxila'u noxou. Ia ta mitema va'axu ilomusou vaivaikala latala ne no anu vaikala tovola'isi. Mo sou,

‘ane'i imalei, ia imaisou mii vile uasi,
mo ilolomu, ia ilavusou mii vile uasi.’
11Ioxe, vaikala tovola'i ane ne, laaxu aloxo 'o. Ovu ngiaxu ne, anu musosovosou vaikala noxou Lataua. 12Vaikala ane anu musu'anu xe mulapau no vote'i ne, anu loxo ta mitema ane ilomusou vaikala noxou Lataua, ia Satani une'e la uxexeenu vaikala ane Lataua mutounu no opone'i ne alaxu vilesisi. Xo Satani uxavutala lexe loxo 'o io ane'i imulaxu tane'i noxou Lataua, la Lataua upamauline'i. 13Xe vaikala ane anu musu'anu, io mulapau no lavolavo'o ne, anu loxo ta mitema ane ilomusou vaikala noxou Lataua la ino'u palea mo i'osasou. Ia tava'u xo uliuli'a uasi, la vaikala ne uxolu maxuveeni uasi. Xe no anu voxo ane loxo tovotovo uxali noxi'a, la ane'i ilapau alaxu vilesisi. 14Xe Vaikala ane anu musu'anu xe mulapau no xuxua tanu ne, anu loxo ta mitema ane ilomusou vaikala noxou Lataua ne. Ia ane'i imulinu masaxa noxi'a sou ixavutala piena no anu mauli ilou xoluxolu no lia 'o mo imasaxa lexe i'a lavuluti piena mo opone'i uisuisuxu mimii iouiou, la sou anu mimii ane ne uvausou vaikalau Lataua la unene'a uasi. 15Ia vaikala ane musu'anu xe mulapau no lia laixe ne, anu loxo ta mitema ane ilomusou vaikala noxou Lataua no anu opone'i lailaixe manina, la ino'u mo itetelisou pekia'u la inene'a.”

Telu Utulu Teitexi no Valovalo sou Ukaa

(Mak 4:21-25)

16 ^cIesu muavuti, la muvikala aloxo 'o la, “Itema vile umomomo sou u'elaxu telu ka utulu pupunisou xe utalumeu no lia no laaxu luu uasi. Ia anu utulusou teitexi no valovalo, mo sou ta mitema e i'una no tani ne, la imaisou lamana ane ne. 17 ^dXo mimii ukalusi ane mutalume ne, ili'i la anu upala'a. Mo mimii ukalusi ane ta mitema mivauvausou mo a uai ne, ili'i la upala'a no taatexa. 18 ^eAloxo ne, la sou ngingi ngalaxa'ingengi sou ngalomusou vaikala. Xo lexe itema vile mimiu tavu'alo sevile, la Lataua ulosou mose'i la. Ia lexe itema ane miumiu uasi, ia uxavutala lexe anu miu sevile ne, la Lataua uxexee noxou.”

Iesu Nenu Ilo'a ta Vimovimou

(Mat 12:46-50; Mak 3:31-35)

19Xe ili'i, la Iesu nenu ilo'a ta vimovimou mine'e sou lexe imaisou, ia ane'i imomomo sou ixali noxou uasi. Xo ta mitema tapiena musuku, la mitaluxa'a. 20La sou itema vile muvikalanu Iesu aloxo 'o, “Nenine ilo'a ta vivine ane'i a itutulu no ale sou imasaxa lexe imaisine.”

21La Anu mukolinu vaikala noxou mitema ne aloxo 'o, “Ane'i ane ilomusou vaikala noxou Lataua mo imulinu, la ane'i ne eni nenilo mo ta vivilo.”

Iesu Mukaitolone'i Sivo Ilou Xasi

(Mat 8:23-27; Mak 4:35-41)

22No voxo vile ili'i, la Iesu muvikalane'i ta molomolo noxou lexe, “Nenge'a talai no kupa xalee vile.” La sou ane'i ilo'a mitelo no anu uaxa sou milai. 23Ane'i mivole uaxa ne lexe sou ilai xalee vile, la Iesu mupasipaa la muai. Ia atume vile tatila muilisou kupa, la muavutinoxu xasi tatila mole lexa mu'una no anu uaxa mo 'alai sou i'uo'uo.

24La sou ane'i milai mitulusou Iesu sou mivikalanu lexe, “Tilasixe, tilasixe. Natulu mo nasu'ulinenge, xo nenge asou ta'uo'uo!”

Xe Iesu muavuti mutulu, la mukaitolone'i atume ilou xasi tila ne. La atume ilou xasi tila ne, tasiauxa'a avile mo lexa loxo'u muai se'isisi. 25Mukalu, la sou Iesu muvikalane'i ta molomolo noxou aloxo 'o, “Loxovaa, la sou ngingi ngamuxaxu tangengi noxilo uasi 'o?”

Iesu mu'oxo aloxo ne xe ane'i mimaisou, la ane'i mikuluke mo mimama'u. La sou mivikalane'i ngatongato'o aloxo, “Itema ano 'o ne, Anu itema ma'i 'o? La sou atume ilou xasi milomuxu vaikalau 'o.”

Iesu Mukusau Ulee Vile Masua Muxolu Noxou Mitema Vile

(Mat 8:28-34; Mak 5:1-20)

26Ane'i mivole uaxa no anu kupa ne Xalilaia, la milai mixali no xalee vile no xalee lia tila ne Xelasene. 27Xe Iesu muili'e muuatu no uaxa sou lexe ulai no ale. La mitema vile e ulee masua muxolu noxou ne, molu no tuala ane ne mune'e muxalisou Iesu. Itema ane ne, anu ulavusou usakii malo uasi mo ulavusou uxoxolu no tani vile uasi maxuveeni manina. Ia ulavusou uxoxolu no loulousi'a ta mitemasi. 28Io, no mine anu mumaisou Iesu, la anu mu'ava tatila ka mulapau noxou Iesu tava'u. Io anu muunga toxoxa'a mulai noxou Iesu sou muvikala aloxo 'o, “Iesu, nini Lataua e muxolu teitexi manina 'Olu. Nini nemasaxa lexe na'oxonu ma'ia noxilo? Eni alingaine lexe mamu sou na'oxo masua noxilo!” 29Anu mu'ava tatila aloxo ne, xo Iesu muvikala pekia'u mulai noxou lexe uxexesou mitema ne. Xo ta mitema e isaxila'u itema ne, misakisakiinu avolu ilou tava'u no anu xalolo. Ia alaxu tavu'alo, xe ulee masua ne u'aisou, la anu uxotosou xalolo ane ne. Io, ulee masua ne ulaixu no xalee lia ane ta mitema ixolu no anu uasi.

30La Iesu mutali'isou aloxo 'o, “Ualasine a loxovaa?”

La anu mukolinu aloxo 'o, “Ualasilo lexe Lexioni.” Xo ta ulee ta masumasua tavu'alo mixolu mipita noxou. 31Ane'i milinga noxou Iesu alaxu tavu'alo lexe mamu sou Anu ukusai'a ilai no taxa e kaluxusou uasi.

32Ia, ta memee la'oluxa'a vile toxoxa'a a i'ani'ani no laxa'ilu vile 'alai ne. La sou ta ulee ta masua ne, milinga pekia'u noxou Iesu lexe upalusi'a ilai i'una noxi'a ta memee ne. La Iesu muvikala lexe ilai i'una noxi'a. 33La sou ane'i mixexesou mitema ane ne, io milai mi'una noxi'a ta memee. Mi'una noxi'a, la ta memee la'oluxa'a ne miia'uxu milu'e no tava'u maea e no kupa ne, la mi'uo'uo mole misoisoli mukalu.

34Xe ta mitema sou isaxila'a ta memee ne, mimaisou mii ane ne, la mi'ume'ume sou milai mia'alo no tuala xe tuatuala ane muxoluxolu no pa'upa'umolu tuala ne. 35La sou ta mitema sou tuatuala ne mine'e sou mimaisou mii ma'ia ane muxali ne. Mine'e xe mixali noxou Iesu, la mimaisou itema e ta ulee ta masumasua mi'aisou ne a mutokolomo mo a uxoxolu noxou Iesu tava'u. Xavutalau ne, mulamana ia uxovulaulau la uasi. Ta motu mimaisou aloxo ne, la mimama'u misevile. 36Xe ta mitema ane ane'i mimaisou mii ane ne, mia'aloi'a ta mitema ane mixali ne sou imaisou itema ane ta ulee ta masumasua mixolu noxou ne, muxali laixe. 37Xe ta mitema latala no xalee lia tila ne Xelasene miavuti, la mivikalanu Iesu pekia'u lexe Anu uxexesi'a. Xo ane'i mimama'u manina. La sou Iesu mutelo no anu uaxa sou mulai.

38Ioxe, Iesu asou lexe utelai no anu uaxa, la itema e ta ulee ta masumasua mixolu noxou ne, mutali'isou pekia'u lexe anu umulinu mo ilou ilai. Ia Iesu mulivusou, la muvikalanu lexe, “Nalai no tualasine mo nalai noxi'a ta minemineni la naa'aloxu mimii latala ane Lataua mu'oxonu noxine.” La sou, anu itema ne mulai la musoko sou mua'aloi'a ta mitema mukalusi no tualasou no anu mimii latala e Iesu mu'oxonu noxou ne.

Molomolo Sema Misoli Ilee Sema E Sialu Mulu'e Noxie

(Mat 9:18-26; Mak 5:21-43)

40Ioxe, Iesu mulivu mune'e no kupa pa'umolu xalee vile, la ta mitema tavu'alo misevile milooxu sou misexelaxu. Xo ane'i mixolu ne imulaxu tane'i sousi. 41La itema vile sou usaxila'u taasou lalotu noxi'a ta Iutaia ne, ualasou lexe Iairo ne mune'e muxali. Mune'e muxali noxou Iesu, la mulapau mulu'e noxou Iesu tava'u, sou mukatu pekia'u lexe Iesu ulai no taasou. 42Xo anu 'olu sema se vilesisi kitu'a ne, ane asou isoli. Ane tauu iexe loxo mavulovexa mo mulu'e no lia tamei.

La sou Iesu mulutu sou ilou milai. Ilou milai ne, la ta mitema tavu'alo ne mimulinu, la mitomu manina. 43Mo sema vile mine'e kalumo. Ane sema ne, sialu ululu'e noxie, la ukalu noxie uasi. Muxolu tauu ie mavulovexa mo mulu'e no lia tamei. Ia itema vile umomomo sou upamauline uasi. 44Ane mine'e mimulinu Iesu 'alai no tumalou, ka mikasou tokolomoxu e veveeni ne telexu. La sialu ne, mutalo mo mukalu avile.

45La Iesu muavuti la mutali'isi'a ta mitema aloxo 'o, “Ngingi 'ena'ei ane mukasilo 'o?” La ane'i mikolinu lexe, “Nexi takasine uasi.” Ia Pita muavuti la muvikalanu Iesu aloxo 'o, “Tila, nini nalavusou lexe ta mitema tavu'alo musuku ane mipita 'o la sou misousouneni ne uasi?”

46Xe Iesu muvikala aloxo 'o, “Eni elavu lexe ngingi vile a mukasilo 'o, xo eni examuli xavi noxilo a muxexesilo.”

47Anu muvikala aloxo ne, la sema ne milavu lexe ane imomomo sou italume uasi. La sou ane mi'olo'olo mine'e sou milapau noxou Iesu tava'u. Xe no ie'i ta mitema tavu'alo ne, la ane mivikala lamana lexe tava'u loxovaa la sou ane mikasou Iesu ne mo mivikala lamana kalumo lexe pipienaxe ne a muxexesie mo ane laixene avile. 48 ^fLa Iesu muvikalane aloxo 'o, “'Alixeni, nini nemulaxu taneni noxilo, la sou pipiena noxine ne a mukalu. Nalai, ia oponeni uai se'isisi.”

49No mine Iesu uao uvivikala sio, ia ta mitema se'i me'a no taasou Iairo, anu itema sou usaxisaxila'u taasou lalotu noxi'a ta Iutaia, mine'e mivikalanu aloxo 'o, “'Iline sema ne a misoli ne. Ia na'ausou itema sou ulosinge lavulavu ne malaxo mamu.”

50Iesu mulomusou vaikala ane ne, la muvikalanu Iairo aloxo 'o, “Na'olo'olo mamu. Ia namuxaxu taneni noxilosi, la 'iline ne imauli.”

51Ioxe, Iesu mulai muxali no tani noxou Iairo, la Iesu muno'a Pita ilo'a Ioanesi ilou Iakovo mo molomolo sema ne mamie ilee neniesi sou ilo'a mi'unalai no tani. Xo Iesu umasaxa lexe evile la umuline'i uasi. 52Iesu mu'unalai no tani, la mumaisi'a ta mitema tane'ixe molomolo ne mo itatamasie. Xe Iesu muavuti, la muvikalane'i aloxo 'o, “Ngatama mamu. Xo ane isoli uasi, ane miaisi ane.”

53Iesu muvikala aloxo ne, la ane'i mikekeiou xo milavusou lexe ane misoli. 54Ia Anu muavuti la mukasi vaxa no avole, ka sou muvikalane aloxo 'o, “'Alixeni seo, nini natulu!” 55Iesu muvikalane aloxo ne, la uleenu mulivu mune'e mu'una noxie. La ane mitulu alaxu vilesisi. Mukalu, la Iesu muvikalane'i lexe ilosie 'ani sou i'ou. 56Molomolo ne mamie ilee nenie mimaisou aloxo ne, la mikuluke manina. Ia Iesu muvikala pekia'u noxi'a ilou aloxo 'o, “Masi la, ngingi ngongou ngavikalanu itema vile sou mimii ane muxali 'o, mamu.”